Aẓar SLM akked yisuddam-is

Sɣur: D.Messaoudi

Qqaren tutlayt wid at tt-isegmayen d wid ay tt-iseqdacen. Akk-a ihi tal tikkelt ara d-nmager tikti umi ur nesɛi ara awal deg tutlayt-nneɣ, yessefk ad nenadi arma nufa-t-id neɣ nesnulfa-t-id. Maca, akk-nni d-nniɣ yakan umayna, mi ara d-nesnulfu awal, yessefk ad d-nernu isuddam-is akken ur nḥeṣṣel ara ɣer sdat.

**************************************************************
TAFṚANSIST – TAQBAYLIT

- Islam (islam)

- – Nnan tigejda n yislam semmust. (on dit que les piliers de l’islam sont au nombre de cinq)

- Islamité (tinneslemt)

- – Nnan gar tgejda n tmagit n uwanek azzayeri tella tinneslemt. (on dit que parmi les piliers de l’identité algérienne, il y a l’islamité)

- Islamiser (sneslem)

- – Nnan kecmen-d Waɛraben ɣer Tefriqt n Ugafa akken ad senselmen Imaziɣen. (on dit que les Arabes ont conquis l’Afrique du Nord pour islamiser les Berbères)

- Islamisation (asneslem / tasneslemt)

- – Asneslem n Tefriqt n Ugafa yekka ddeqqes n yiseggasen. (l’islamisation de l’Afrique du Nord a pris tant d’années)

- Islamique (anselman)

- – Ula d Imaziɣen kkin deg tɣerma tanselmant. (même les Berbères ont contribué à la civilisation islamique)

- Islamisme (taẓrislamt)

- – Taẓrislamt d aseqdec n yislam s yeswi asertan. (l’islamisme c’est l’usage de l’islam avec un objectif politique)

- Islamiste (amẓerislam)

- – Imẓerislamen kkaten ad sekren taxaleft tanselmant deg umaḍal. (les islamistes luttent pour construire un califat islamique dans le monde)

- Musulman (imeslem)

- – Yettẓalla yimeslem semmust n tikkal deg wass. (le musulman prie cinq fois par jour)

***

TAMAWT: llan wid d-yeqqaren dakken awṣil « iẓri » yessefk ad yili d amezwaru deg wawal, llan wiyaḍ d-yeqqaren ilaq ad yili d aneggaru. Nekk smenyifeɣ ad yili d amezwaru imi yeḍfer ilugan n wawal amaziɣ.